A Consellería do Medio Rural ampliará ata o 15 de decembro o prazo de presentación da licenza municipal de obra e dos diferentes permisos administrativos correspondentes ás axudas de plans de mellora, incorporación de mozos e pequenas explotacións. Así o formalizará o Diario Oficial de Galicia nos vindeiros días, aumentando excepcionalmente en tres meses o período marcado inicialmente para aportar esta documentación.
O orzamento desta convocatoria –encadrada no Programa de Desenvolvemento Rural (PDR) de Galicia 2014-2020– chega aos 41 millóns de euros. En concreto, 24 millóns irán destinados a plans de mellora, 14 millóns investiranse na incorporación de mozos á actividade agraria e 3 millóns de euros focalizaranse na creación de empresas para o desenvolvemento de pequenas explotacións.
