A Consellería do Medio Rural destinará este ano 2,38 millóns de euros a 64 Agrupacións de Defensa Sanitaria Gandeira (ADSG) de Galicia co obxectivo de reforzar o bo estado sanitario da cabana gandeira galega.
A resolución destas axudas publícase este martes no Diario Oficial de Galicia (DOG) e beneficiará a totalidade das ADSG existentes na comunidade. Segundo a Xunta, a convocatoria, publicada a finais de 2025, esgotou todo o crédito dispoñible.
As subvencións permitirán financiar gastos vinculados ao desenvolvemento de programas sanitarios, como a compra de material funxible —luvas, calzas, tubos de extracción de sangue ou agullas—, así como facilitar a contratación de 162 veterinarios encargados de planificar e executar as actuacións zoosanitarias destas entidades.
O obxectivo destas axudas é avanzar na prevención e control de enfermidades animais mediante programas comúns, especialmente naquelas patoloxías que non adoitan estar incluídas nos programas nacionais. Con iso, a Xunta busca manter o bo status sanitario da gandería galega, garantir a rendibilidade das explotacións e favorecer a comercialización de animais e produtos gandeiros.
Ademais, as ADSG beneficiarias comprométense a aplicar as medidas sanitarias adicionais que resulten necesarias nas explotacións adheridas, atendendo ás condicións de cada zona e ás características de cada agrupación. Neste ámbito, poden colaborar na vixilancia de enfermidades como a lingua azul ou a enfermidade hemorráxica epizoótica (EHE).
Estas asociacións, constituídas por gandeiros, traballan para mellorar o nivel sanitario e zootécnico das explotacións mediante programas de profilaxe, control de enfermidades e mellora das condicións hixiénicas. Medio Rural destaca que as ADSG son unha peza fundamental da rede de epidemiovixilancia de Galicia e colaboran estreitamente cos servizos veterinarios oficiais.
