A Consellería do Medio Rural da Xunta de Galicia vén de ampliar ata 3,6 millóns de euros a dotación da segunda convocatoria de 2025 das axudas destinadas ao fomento do uso de maquinaria agrícola en réxime asociativo. O Diario Oficial de Galicia publica hoxe a orde que autoriza este incremento orzamentario, que se suma aos 2,4 millóns investidos na primeira convocatoria do ano, da que se beneficiaron 34 cooperativas e sociedades agrarias de transformación (SAT) resultantes de procesos de fusión.
A segunda convocatoria fora publicada o pasado 5 de agosto cunha dotación inicial de 400.000 euros e a posibilidade de ampliarse ata 3,2 millóns. Coa nova orde, o orzamento aumenta finalmente ata os 3,6 millóns, sen modificar o prazo de presentación de solicitudes, que xa rematou.
O obxectivo destas subvencións é impulsar o uso compartido de maquinaria por parte de entidades asociativas do sector agrario, de maneira que se reduzan os custos de produción, se mellore a seguridade no traballo e se promova o aforro enerxético. As axudas cobren o 35 % do custo do equipamento, cun posible incremento ata o 50 % en determinados casos.
