Proxectos de innovación no rural contarán con seis millóns de euros en axudas

Proxectos de innovación no rural contarán con seis millóns de euros en axudas

Até 61 proxectos dos grupos operativos da Asociación Europea de Innovación (AEI) contarán até 2020 cun investimento de case seis millóns de euros que se destinarán a programas de produtividade e sustentabilidade agrícola e forestal que contribuirán a mellorar a competitividade das empresas agrarias galegas. Estarán cofinancinados pola Consellería do Medio Rural da Xunta de Galicia e o Fondo Europeo Agrícola de Desenvolvemento Rural (Feader).

Unha das gandarías beneficiarias destas axudas, a Gandaría Patalarga (A Guarda, A Pastoriza), recibiu esta mañá a visita da conselleira de Medio Rural, Ángeles Vázquez, quen destacou o compromiso desta explotación co avance do rural. Patalarga conta con 62 animais en muxidura que están producindo 450.000 litros anuais, dedican 47 hectáreas de terreo á produción de herba e actualmente están a desenvolver un programa de valorización do leite producido en explotacións ecolóxicas e convencionais. Este estudo, iniciado en 2016, aborda a relación entre a dieta dos animais e a calidade do seu leite, así como a sustentabilidade ambiental e económica das explotacións.

Neste caso, o programa conta cunha axuda de 108.576,9 euros e está desenvolvido polo Laboratorio Interprofesional Galego de Análise de Leite (Ligal), o Centro de Investigacións Agrarias de Mabegondo (CIAM) e a Asociación Galega de Cooperativas Agrarias (Agaca).