O Consello de Ministros aprobou as bases reguladoras das subvencións destinadas á obtención de avais da Sociedade Anónima Estatal de Caución Agraria (SAECA). Poderán ser adquiridas polos titulares de explotacións agrarias ou empresas de servizos agrarios que garantan préstamos para a adquisición de maquinaria agrícola nova. Tras a aprobación destas bases reguladoras, o Ministerio de Agricultura, Pesca e Alimentación publicará proximamente a convocatoria de subvencións correspondente ao ano 2021, que o ministerio prevé dotar cun orzamento de 3 millóns de euros.
O obxectivo principal destas axudas é promover a renovación do parque de maquinaria agrícola mediante a mellora do acceso ao crédito ligado á adquisición de maquinaria nova. O ministerio subvencionará o custo do aval por un importe de ata 100.000 euros, durante os 10 primeiros anos do crédito avalado, coa posibilidade dun ano de carencia. A maquinaria adquirida (tractores, remolques agrícolas ou cisternas para o transporte e distribución de líquidos, entre outros) deberá estar incluída no grupo de máquinas de obrigatoria inscrición nos Rexistros Oficiais de Maquinaria Agrícola.
