A organización da Space 2020 (que está programada para celebrarse en Rennes do 15 ao 18 de setembro) acaba de anunciar que, como moi tarde, comunicarán a decisión final sobre o mantemento ou a suspensión da súa mostra antes de mediados de xuño.
“A epidemia da COVID-19 que actualmente está a causar estragos en todo o mundo non nos permite ter a certeza de poder organizar o evento na data prevista, xa que a día de hoxe non podemos saber se en setembro se permitirán grandes concentracións como a Space, nin se as medidas sanitarias que garantan a seguridade das persoas poderán aplicarse correctamente”, explicaron os seus portavoces. Por este motivo, e para que tanto participantes como expositores poidan dispoñer desta información nun prazo aceptable antes do evento, veñen de fixar o mes de xuño como data límite para anunciar a continuidade ou anulación da feira, á espera de que neste mes e medio entre medias a situación poida mellorar.
O Salon International deas Productions Animales congrega todos os anos a máis de 1.400 expositores e a máis de 100.000 visitantes en Rennes, rexión na que o sector agrícola e todos os seus traballadores son motores moi importantes. Por este motivo, “para apoiar todos os elos da cadea alimentaria, desexamos seguir facendo todo o posible para que a Space 2020 poida celebrarse se se reúnen todas as condicións indispensables para iso”, subliñaron os seus representantes.
