Xa está dispoñible en formato online a Memoria de actividades correspondente ao ano 2025 da Asociación para o Control Leiteiro Africor Lugo, a través da cal, como cada ano, a entidade fai balance da xestión do Control Leiteiro como ferramenta fundamental para a xestión e rendibilidade das explotacións.
Na publicación enuméranse os servizos que a asociación lles brinda aos seus asociados; as actividades levadas a cabo, entre as que salientan a XVII Xornada Técnica de Produción de Leite, xunto con Vaca Pinta; as poxas organizadas e a promoción e difusión do sector; así mesmo, recompílanse os datos do Control Leiteiro, así como os méritos das principais ganderías no seu labor como criadores e produtores de leite da provincia en diferentes categorías como a produción ou a cualificación morfolóxica e, de xeito particular, destácanse os datos das fillas de touros de Xenética Fontao.
Como obxectivo final das granxas sublíñase a súa rendibilidade, lograda mediante a mellora xenética para obter animais máis resistentes, duradeiros e capaces de producir leite de calidade a menor custo.
