Monge Veterinarios celebrará os vindeiros 22 e 23 de outubro, nas súas instalacións de Guadalix de la Sierra (Madrid), un curso centrado no uso da ecografía como ferramenta para o control reprodutivo en gando bovino. A formación combinará contidos teóricos con sesións prácticas e estará dirixida por Alfonso Monge, coa participación de Eutiquio Esteban e Jesús Redondo Morcuende.
Durante a primeira xornada abordaranse as principais aplicacións prácticas da ecografía en reprodución bovina, así como a súa utilidade para mellorar os resultados reprodutivos. O programa inclúe a retracción uterina directa e indirecta para unha correcta exploración manual e ecográfica, as vantaxes e desvantaxes desta técnica fronte á palpación rectal e o control ecográfico do útero e dos ovarios. Tamén se tratará o diagnóstico de xestacións temperás e tardías e a exploración ecográfica do aparello xenital do macho.
A tarde do xoves completarase cun wet-lab de prácticas con pezas de matadoiro, impartido por Alfonso Monge, Eutiquio Esteban e Jesús Redondo. O venres 23, a formación trasladarase á granxa para desenvolver unha sesión práctica de ecografía, tras a que terá lugar a entrega de diplomas.
O curso ten un prezo de 400 euros e está limitado a un máximo de 12 alumnos, que serán admitidos por orde de reserva. As persoas interesadas poden obter máis información e formalizar a súa inscrición a través de Alfonso Monge, no teléfono 639 181 289.
