A Consellería do Medio Rural abriu este luns, 2 de novembro, o prazo para solicitar o arrendamento de parcelas a través do Banco de Terras de Galicia, que permanecerá aberto ata o próximo día 20. A convocatoria está dirixida a persoas que necesiten terreos para desenvolver ou ampliar unha explotación agraria ou forestal, así como para levar a cabo proxectos ambientais, paisaxísticos, de conservación da natureza ou outros fins.
O Banco de Terras ten como obxectivo evitar o abandono das terras agrarias e facilitar o seu aproveitamento, actuando como intermediario entre os propietarios das parcelas e as persoas interesadas en utilizalas. A través do Sistema de Información de Terras de Galicia (Sitegal), pódese consultar unha relación actualizada dos terreos dispoñibles para o seu arrendamento.
As solicitudes deberán presentarse preferiblemente por vía telemática, a través da sede electrónica da Xunta de Galicia ou da plataforma sitegal.xunta.gal, mediante o procedemento MR711B. Para obter máis información, as persoas interesadas poden contactar coa Consellería do Medio Rural no teléfono 881 997 193 ou mediante o correo electrónico bancodeterras@xunta.gal.
