A Consellería do Medio Rural da Xunta de Galicia acolleu a pasada semana a presentación oficial da Feira Internacional de Maquinaria Agrícola (FIMA) 2026, que se celebrará do 10 ao 14 de febreiro en Feira de Zaragoza. O acto contou coa presenza de Fernando Cidraque, director de FIMA; Ana Hernández, directora xeral adxunta de Feira de Zaragoza; María José Gómez, conselleira do Medio Rural; e José Balseiros Guinarte, director xeral de Gandaría, Agricultura e Industrias Agroalimentarias.
Durante a presentación, Cidraque destacou a importancia de achegar a feira a territorios clave como Galicia “para atraer o agricultor e o gandeiro galego e amosarlles o potencial tecnolóxico e profesional do evento”. Pola súa parte, Hernández subliñou que “vir a Galicia era fundamental, non só pola cantidade de galegos que nos visitan, senón tamén pola relación que sempre existiu entre Zaragoza e Santiago. Cremos que as feiras son un lugar de encontro, pero nelas teñen que pasar máis cousas”.
A edición de 2026 estará marcada pola innovación tecnolóxica e a formación, coa creación de FIMA Tech, un gran espazo no Pavillón 9 que reunirá empresas, startups, universidades e institucións que impulsan a transformación dixital do campo. Esta área contará con zonas expositivas, demostracións, networking e presentacións rápidas.
Así mesmo, FIMA Conecta Talento establecerá un punto de encontro entre estudantes e empresas do sector agrario, consolidando a feira como o principal referente profesional do sur de Europa.
Na clausura, a conselleira María José Gómez destacou as sinerxías entre Galicia e Aragón: “Únenos a gandaría e a agricultura como principal motor económico de ambas comunidades. Xuntos somos máis fortes”.
