O Centro de Promoción Rural EFA Fonteboa (Coristanco, A Coruña) iniciaba onte un curso de monitor de tempo libre co que lle dá comezo ao seu programa de actividades de formación continua para o período abril-xullo 2021. Outros cursos que están previstos ao longo destes meses teñen que ver cos ámbitos da apicultura, a horta, a prevención de riscos laborais no sector agrogandeiro, o carné de motoserrista ou a comercialización de produtos agroalimentarios, entre outros.
Na área de vacún leiteiro, os días 6, 20 e 25 de maio e 3 e 10 de xuño terán lugar unhas conferencias on-line sobre sanidade animal impartidas por veterinarios de MSD Animal Health España, mentres que do 11 ao 14 de maio se celebrará un curso teórico-práctico sobre muxido, que estará impartido por técnicos do Servizo de Calidade de Leite de Seragro, Química Industrial Savelo e Lely España. Ademais, do 26 ao 28 de maio está previsto o habitual curso de elaboración de lácteos nas instalacións CEFA Pedro Murias de Ribadeo, o cal conta con prazas dispoñible para profesionais interesados en coñecer iniciativas e procedementos de valorización do leite.
