Grupo Durán, empresa lucense especializada na distribución de maquinaria agrícola, adquiriu Galagri (Galicia Agrícola SL), histórica fábrica de maquinaria con sede en Rábade (Lugo). A operación supón un fito na traxectoria da compañía fundada en 1997 pola familia Durán, que incorpora por primeira vez á súa estrutura unha firma con capacidade industrial propia e máis de catro décadas de experiencia no sector.
Fundada en 1983, Galagri participou activamente ao longo da súa historia na mecanización do sector agrario galego e español. Aínda que na actualidade centra a súa actividade principalmente na fabricación de cisternas para xurro, durante estas décadas desenvolveu unha ampla variedade de maquinaria agrícola, entre a que destacan os seus coñecidos remolques autocargadores de forraxe, ademais de grades de discos, cultivadores e remolques de transporte. A empresa conta, ademais, con certificación de calidade ISO 9001 e experiencia na fabricación de cisternas galvanizadas en quente por inmersión, un tratamento orientado a ofrecer unha elevada protección fronte á corrosión e prolongar a vida útil dos equipos.
Galagri dispón dun equipo formado por 15 profesionais especializados e mantén actualmente unha produción superior aos 100 equipos anuais. As súas instalacións, situadas no polígono industrial de Rábade, a uns 15 quilómetros da cidade de Lugo, suman aproximadamente 2.500 metros cadrados cubertos destinados á fabricación, dentro dunha parcela de arredor de tres hectáreas.
CONTINUIDADE E MODERNIZACIÓN PARA UNHA MARCA HISTÓRICA
Con esta adquisición, Grupo Durán dá un novo paso na súa estratexia de crecemento e especialización, incorporando capacidade industrial e coñecemento técnico nun segmento estreitamente relacionado coas necesidades das explotacións agrícolas e gandeiras.
A nova etapa de Galagri estará marcada pola continuidade da súa actividade e do seu equipo humano, ao tempo que Grupo Durán prevé impulsar progresivamente a modernización dos sistemas de produción e mellorar as capacidades de fabricación da planta de Rábade.
“Queremos seguir traballando sobre a base de todo o coñecemento e a experiencia acumulados por Galagri durante máis de 40 anos, mantendo a súa forma de traballar e, ao mesmo tempo, modernizando os sistemas de produción e mellorando as súas capacidades”, sinalan desde Durán.
A incorporación de Galagri amplía agora a actividade de Grupo Durán cunha vertente industrial propia, reforzando a vinculación da compañía co sector agrogandeiro e coa fabricación de maquinaria desde Galicia.
