Asturiana de Control Lechero Soc. Coop. Astur (Ascol) organizou esta fin de semana unha xornada no Recinto Ferial Luis Adaro de Xixón, que reuniu socios, gandeiros, veterinarios e representantes do sector lácteo asturiano. No acto, as ganderías máis destacadas en 2025 por produción, morfoloxía, sanidade e xenética recibiron o seu recoñecemento.
Sete ganderías premiadas
Focara S.C. (Vegadeo) foi premiada por conseguir a maior media de leite en 305 días: 15.523,6 kg en 189 lactacións. A granxa vegadesa tamén foi recoñecida pola mellor produción dunha filla de semental Ascol: Navalla (ESPH3305098951), filla de Maximus, que na súa segunda lactación acadou 21.454 kg de leite.
Pola súa banda, Casa Leonardo S.C. (Corvera) recibiu o galardón á explotación con maior GICO (+1.142 GICO con 56 vacas). Mentres tanto, Ganadería Valledor S.C. (Tineo) foi nomeada a de maior media de produción vitalicia nos últimos tres anos: 63.592,8 kg de leite, cunha media de 6,3 lactacións ao desvelle.
No que respecta aos parámetros de saúde, a granxa con menor media de reconto de células somáticas en 2025 foi Casa Benigno S.C. (Valdés), que rexistrou 59.000 cél./ml en 499 controis. Por outra banda, Ganadería Diplomada Badiola (Gozón) volveu obter o premio á maior media de cualificación morfolóxica, con 87,91 puntos en 127 vacas cualificadas.
Ganadería Casa Curusia S.C. destacou co seu animal Delta (ESPH3305223582), filla de Adaway, xa que liderou a clasificación de mellor vaca primeiriza por produción, tanto na xeral como na categoría correspondente ás fillas de sementais Ascol. Na súa primeira lactación a 305 días produciu 18.325 kg de leite.
Por último, a mellor vaca por produción leiteira en 305 días foi Armenia (ESPH3304075241), filla de McCutchen, de S.A.T. Lluisa (Gozón). Este exemplar acadou, na súa sexta lactación, 24.439 kg de leite.
José Emilio García, presidente de Ascol, considera que “os datos do Cadro de Honra 2025 demostran que os gandeiros non só resisten nunha contorna cada vez máis esixente, senón que están marcando o camiño do resto do sector. Medias de máis de 15.000 quilos, recontos celulares en mínimos históricos e producións vitalicias de máis de 60.000 quilos por vaca non se conseguen con sorte. Lógranse con traballo, técnica e a aposta decidida pola xenética”.
VII Poxa Ascol e charla técnica
As restricións sanitarias vixentes no Principado de Asturias, ditadas para combater a expansión da dermatose nodular contaxiosa (DNC), impediron a celebración do Concurso Rexional de Raza Frisoa. Non obstante, a entidade puxo á disposición do sector frisón asturiano e nacional unha selección de embrións de alto valor xenético na súa VII Poxa Ascol.
Precisamente, en relación coa DNC, celebrouse unha charla-coloquio a cargo de Alberto Díez Guerrier, veterinario clínico, profesor asociado da Facultade de Veterinaria da Universidade Complutense de Madrid e investigador do Centro de Vixilancia Sanitaria Veterinaria (Visavet). Na súa intervención ofreceu unha radiografía actualizada da situación epidemiolóxica e as claves para reforzar a bioseguridade nas instalacións gandeiras.
“Este ano non tivemos concurso, pero si todo o demais. Tivemos coñecemento, recoñecemento, xenética de vangarda e ocasión de celebrar o xantar de confraternización. Iso tamén é ASCOL, e iso tamén é a Feira de San Antonio”, recalcou José Emilio García.
