Este primeiro informe do Centro Tecnolóxico Agroalimentario de Lugo (Cetal) do mes de febreiro contén información correspondente ao pasado mes de decembro, o que permite valorar a evolución do ano 2017. Os datos de España, aínda sendo positivos respecto de 2016, seguen estando lonxe dos rexistrados polos países punteiros da Unión Europea.
O sector lácteo español, a pesar de incrementar a súa produción durante o ano 2017 nun 2,2 %, por encima do 1,9 % rexistrado polo conxunto da UE, e superar por primeira vez a barreira do sete mil millóns de kg, segue tendo un prezo medio do leite moi inferior á media europea.
O prezo medio en 2017 alcanzou os 30,93 €/100 kg, un 6,3 % superior aos 29,11 €/100 kg de 2016, e pechouse o ano en decembro cunha cifra de 32,43 €/100 kg, a máis alta alcanzada desde xaneiro de 2015. Aínda así, estes datos están lonxe dos 37,77 €/100 kg da UE.
