A Escola Internacional de Industrias Lácteas de Zamora (Eilza) convocou unha nova acción formativa sobre gandería 4.0, centrada en innovación e xestión eficiente da granxa, dirixida a mulleres gandeiras ou que queiran incorporarse ao sector e que residan en Castela e León.
O curso, de carácter gratuíto, comezará o 31 de agosto de 2026 e impartirase en modalidade online. A formación contempla 152 horas lectivas, ás que se suman 16 horas de prácticas presenciais, distribuídas en dúas xornadas de visitas a ganderías innovadoras de Castela e León.
O programa estrutúrase en 12 módulos organizados en tres bloques temáticos: novas tecnoloxías aplicadas á gandería, melloras no manexo animal e xestión empresarial da granxa. Entre os contidos figuran ferramentas dixitais de monitorización, alimentación de ruminantes, reprodución e mellora xenética, análise de custos, optimización da produción, subvencións e vías de financiamento.
As alumnas poderán inscribirse no programa completo, por bloques temáticos ou en módulos soltos, sen custo en calquera das modalidades.
