MSD Animal Health e Vaca Pinta celebrarán o próximo 18 de xuño, a partir das 10:30 horas, a xornada Conecta Leche, un encontro dirixido a gandeiros, técnicos e profesionais do sector lácteo que se celebrará no Hotel Torre de Núñez de Lugo.
Baixo o subtítulo “Da monitorización á mellora real da túa granxa”, a cita poñerá o foco en como a información, a tecnoloxía e o seguimento continuo poden axudar a mellorar a xestión diaria das explotacións leiteiras.
O programa comezará coa benvida e recollida de acreditacións. Ás 11:00 horas, Carlos Sánchez, de Tauste Ganadera, impartirá a ponencia “Do establo ao despacho: como xestionar unha granxa de leite de hoxe”, na que abordará os retos actuais da xestión dunha explotación láctea moderna.
Ás 12:00 horas, Carolina Tejero, de MSD Animal Health, ofrecerá a charla “Ningunha etapa se improvisa: monitorización continua desde o primeiro día”, centrada na importancia de acompañar cada fase produtiva con datos e seguimento para anticiparse aos problemas e avanzar cara a unha toma de decisións máis eficiente.
A xornada continuará ás 13:00 horas cunha mesa redonda con gandeiros da zona, moderada por Ángel Revilla, de MSD Animal Health, na que Marcos Alvite, (Granxa Pazos, Mazaricos), Román González (SAT Prolesa, Sarria), José Manuel Fernández (SAT Busto Corzón, Mazaricos) e Odón Castro (SAT O Palamora, Láncara) compartirán experiencias reais, necesidades do sector e oportunidades vinculadas á monitorización e á mellora do manexo en granxa.
O encontro finalizará cunha comida para os asistentes, pensada tamén como espazo de intercambio entre profesionais.
As persoas interesadas en asistir deberán solicitar a inscrición previamente a través desta ligazón habilitada pola organización.
