Os agricultores e gandeiros españois terán reducións fiscais excepcionais no rendemento neto do Imposto sobre a Renda para as Persoas Físicas (IRPF) pola adquisición de gasóleo agrícola e de fertilizantes. Trátase dunha medida que busca paliar os efectos do encarecemento dos custos de produción.
Esta medida contémplase na orde do Ministerio de Facenda e Función Pública pola que se desenvolven para o ano 2023 o método de estimación obxectiva do IRPF e o réxime especial simplificado do Imposto sobre o Valor Engadido. O sistema de estimación obxectiva agraria é o maioritario entre os agricultores e gandeiros de España, ao que se acollen voluntariamente cada ano uns 850.000 declarantes.
Esta medida excepcional inclúe a redución do 35 % do prezo de adquisición do gasóleo agrícola e do 15 % do dos fertilizantes. Ademais, mantéñense os índices correctores aplicables ao rendemento neto minorado que se aplicaron excepcionalmente na declaración da renda de 2021 por pensos adquiridos a terceiros e por cultivos en terras de regadío que utilicen enerxía eléctrica. Tamén se mantén nos niveis de 2021 o índice por uso de electricidade para a rega, cunha redución dun 25 % do rendemento neto extensible a todos os regadíos.
