Un ano máis, A Asociación Provincial de Criadores de Frisón da provincia da Coruña, Africor Coruña, fai pública toda a información obtida a través do Control Leiteiro nas explotacións da provincia.
Esta nova publicación, estruturada en 11 capítulos e 108 páxinas, recolle desde os datos produtivos e os índices reprodutivos ata o reconto celular, a cualificación morfolóxica, a valoración ICO, a taxa de non retorno, a distribución de seme e as listaxes das mellores vacas por rendemento anual e vitalicio.
Os datos do Control Leiteiro ratifican a progresión do sector vacún na Coruña durante o pasado exercicio, no que salienta a cifra de produción media, con 11.432 quilos por vaca.
A entidade asocia esta evolución á profesionalización das granxas en catro áreas: a selección xenética, a nutrición, o benestar animal e a xestión eficiente, dentro dun sector que consolida a robotización do muxido e dimensiona as súas estruturas cunha media de 123 vacas por explotación.
