A segunda poxa de setembro en Fonterra rebaixa lixeiramente as cotizacións dos derivados do leite. O índice global de prezos do comercio de produtos lácteos descende un 0,8 % e o prezo medio acada os 4.041 $/tonelada.
Con todo, o queixo cheddar é un dos produtos que continúa aumentando o seu valor, nun 2,2 %, para situarse nos 4.814 $/tonelada.
Pola súa banda, redúcese minimamente a taxación do leite desnatado en po (-0,3 %) e do leite enteiro en po (-0,8 %). A manteiga diminúe o seu valor nun 0,8 % para quedar nos 6.892 $/tonelada.
O descenso máis considerable é para a mozzarella, cun 9,6 % (3.860 $/tonelada). Con todo, a valorización dos lácteos en Fonterra continúa cun prezo máis elevado que o ano pasado polas mesmas datas.
