En Transmedia Comunicación, empresa editora de Vaca Pinta, fomos distinguidos co Premio á Comunicación Agrícola outorgado polo Colexio Oficial de Enxeñeiros Técnicos Agrícolas do Centro, un galardón que recoñece a nosa traxectoria na difusión de contidos especializados e de calidade dirixidos ao sector agroganadeiro.
Para nós, este premio supón un importante respaldo ao traballo que vimos desenvolvendo desde hai máis de 20 anos, cun foco moi claro na transferencia de coñecemento técnico e na visibilización do sector primario. Ademais, valoramos de maneira especial que este recoñecemento chegue desde fóra de Galicia, o que reforza o alcance dos nosos proxectos máis alá da nosa comunidade.
“Estamos moi agradecidos por este recoñecemento, que ademais chega desde fóra da nosa comunidade, o que lle outorga un valor engadido moi especial”, sinalamos desde a axencia. “Para nós é especialmente significativo que o conceda un colexio profesional do ámbito agrícola, porque valida o rigor e a utilidade do noso traballo no terreo técnico”.
Entre os proxectos que impulsamos destaca Vaca Pinta, unha cabeceira de referencia no sector lácteo que se consolidou como un medio técnico de alta especialización. A través de reportaxes, entrevistas e contidos formativos, buscamos achegar a innovación, a investigación e as boas prácticas aos profesionais do campo.
Entendemos este premio tamén como un recoñecemento ao modelo de xornalismo técnico e especializado polo que apostamos en Vaca Pinta. “Que se recoñeza, de maneira indirecta, un proxecto como Vaca Pinta, de carácter eminentemente técnico, é unha gran satisfacción. Significa que o esforzo por ofrecer información rigorosa, útil e próxima ao sector está sendo valorado por quen mellor coñece esta realidade”, engadimos desde Transmedia Comunicación.
Este galardón anímanos a seguir traballando na mesma liña: ofrecendo información útil, rigorosa e especializada para contribuír ao desenvolvemento e á modernización do sector agroganadeiro.
