Os lácteos son produtos importantes da nosa dieta no contexto dunha alimentación variada e sempre acompañada da práctica de exercicio. O leite e os produtos lácteos constitúen un grupo de alimentos completo e equilibrado, xa que proporcionan un elevado contido de nutrientes en relación co contido calórico, polo que non deben faltar durante estes días de confinamento. Achegan proteínas de alto valor biolóxico, hidratos de carbono (lactosa), graxa, vitaminas liposolubles e minerais, especialmente calcio e fósforo. Temos ante nós alimentos alcanzables e próximos pero non suficientemente valorados nin recoñecidos pola poboación española?, pregúntase a Organización Interprofesional Láctea (Inlac) nun comunicado.
As principais guías de alimentación establecidas por organismos nacionais e internacionais recomendan tomar entre dúas e catro racións ao día de lácteos, dependendo da idade e das circunstancias de cada colectivo. En concreto, de tres a catro racións por día sería o aconsellado para a muller durante o embarazo e a lactación, na adolescencia, para deportistas e persoas de idade avanzada, explica Rosa María Ortega, doutora en Farmacia e catedrática de Nutrición na Universidade Complutense de Madrid. Con todo, o consumo dos españois está con frecuencia por baixo do recomendado, o que se asocia con prexuízos nutricionais.
3 racións ao día, a media
Unha ración de leite equivalería a 200-250 mililitros (unha cunca ou vaso), mentres que a ración de iogur serían 250 gramos (2 iogures). A porción de queixo semicurado ou curado roldaría os 30 gramos e, a de queixo fresco, sobre 60 gramos. Con estas pautas, serían facilmente alcanzables as tres racións ao día, de media. A doutora Rosaura Leis, coordinadora da Unidade de Gastroenteroloxía, Hepatoloxía e Nutrición Pediátrica do Hospital Clínico Universitario de Santiago, líder do GI Nutrición Pediátrica do IDIS e membro do CiberObn, subliña que os lácteos son un alimento de consumo diario e fundamental nas dietas atlántica e mediterránea, ao achegar proteínas de alto valor biolóxico, ademais de importantes graxas, minerais (sendo a principal fonte de calcio) e vitaminas".
O catedrático de Nutrición e Bromatoloxía da Facultade de Farmacia e director do Departamento de Ciencias Farmacéuticas e da Saúde da Universidade CEU San Pablo, Gregorio Varela Moreiras, indica, por exemplo, que as proteínas dos lácteos teñen alta calidade biolóxica, é dicir, son altamente aproveitables para o fortalecemento e o mantemento da masa muscular, mentres que o calcio é clave para manter unha boa estrutura ósea, para estar activo e na práctica deportiva.
