O Diario Oficial de Galicia (DOG) publicou hoxe unha resolución da Consellería do Medio Rural que prorroga un mes máis as medidas de prevención fronte á Dermatose Nodular Contaxiosa (DNC). A prórroga entrará en vigor do 2 de febreiro ao 1 de marzo (ambos incluídos) e poderá ampliarse se a evolución epidemiolóxica o esixe.
Aínda que a situación en Cataluña considérase favorable, a aparición de novos casos en Francia aconsella manter as medidas cautelares en Galicia para protexer a cabana bovina. Permítense feiras, certames, poxas, mercados e concentracións de gando bovino con finalidade comercial, pero só con animais procedentes de explotacións galegas. Os vehículos de fóra de Galicia que acudan a estes eventos deben entrar baleiros e en condicións de limpeza, desinfección e desinsectación.
Para a celebración extraordinaria de concursos, certames, poxas e exhibicións esíxese autorización previa da Dirección Xeral de Gandería, Agricultura e Industrias Agroalimentarias, e tamén só poderán asistir animais de explotacións galegas.
Vixilancia veterinaria de 21 días
Segue vixente un período de vixilancia veterinaria oficial de 21 días para bovinos que cheguen de fóra de Galicia con destino a vida. Durante ese tempo, a explotación que os reciba queda inmobilizada de forma cautelar, afectando a todos os bovinos presentes na granxa na data de entrada dos novos animais. Tamén se mantén a obriga de desinsectar todos os bovinos da explotación receptora e todos os vehículos de transporte que realicen entradas de gando a Galicia, tanto para vida como para sacrificio. No caso de sacrificio, permítese a entrada se o traslado é directo ao matadoiro. Os Servizos Veterinarios Oficiais continuarán coas actuacións de inmobilización, vixilancia sanitaria e controis de limpeza e desinsectación, co apoio das forzas de seguridade.
A Xunta reitera unha mensaxe de tranquilidade: non hai constancia de casos en Galicia e a enfermidade non se transmite ás persoas.
