Este venres, a Consellería do Medio Rural publicou no Diario Oficial de Galicia (DOG) unha convocatoria de axudas para a subministración de froita, castañas e leite nos centros educativos que así o soliciten para o curso académico 2026/27. Estas axudas, que contan cun orzamento de case 950.000 euros, serán xestionadas a través do Fondo Galego de Garantía Agraria (Fogga). Segundo o publicado, investiranse preto de 620.000 euros no programa de froita e máis de 345.000 no de leite, cofinanciados polo Fondo Europeo Agrícola de Garantía (Feaga).
Prazo aberto para Educación Infantil de segundo ciclo, Educación Primaria e Educación Secundaria
O propósito destas axudas é fomentar o consumo destes produtos desde idades temperás para, deste xeito, formar uns hábitos alimentarios nos que se integren de maneira natural. Os centros educativos que queiran participar terán de prazo ata o 30 de setembro para presentar a súa solicitude. Os destinatarios finais desta liña de axudas son os alumnos e alumnas de Educación Infantil de segundo ciclo, Educación Primaria e Educación Secundaria, na que se inclúen igualmente o Bacharelato e a Formación Profesional de grao medio. En total, estímase que máis de 80.000 alumnos e alumnas poderían beneficiarse destas axudas.
Haberá dous períodos de distribución autorizados, de novembro de 2026 a febreiro de 2027 e de marzo a xuño do próximo ano. En cada período, a distribución de froitas frescas e castañas levarase a cabo durante 10 días lectivos consecutivos, mentres que, no caso do leite líquido, terá lugar durante un mínimo de 10 días lectivos seguidos.
