A Organización Interprofesional Láctea (Inlac) impulsa dende este venres unha nova fase da campaña promocional “Te lo agradece”, que inclúe unha segunda onda de anuncios na televisión e accións divulgativas con sinalización específica en máis de 400 puntos de venda (Eroski, El Corte Inglés-Hipercor, Ahorramás e Carrefour), co obxectivo de reactivar o consumo nacional de lácteos nun momento clave no que millóns de españois regresan das vacacións e deben repoñer alimentos para afrontar a volta á oficina e aos colexios.
A iniciativa trata de concienciar os consumidores, que teñen co seu poder de compra a chave para fomentar o relevo xeracional, garantir a viabilidade do sector lácteo e o futuro rural no noso país.
A directora xerente de Inlac, Nuria María Arribas, valorou que “todo o sector adherido á Interprofesional está a traballar intensamente para lograr que mellore a comercialización de alimentos lácteos elaborados en España, como leite, queixo e iogur, porque con iso potenciaremos a economía, o emprego e ofreceremos máis oportunidades no medio rural para a mocidade, nun contexto no que seguen entrando grandes volumes do exterior”. No pasado, España adoitaba importar leite cru como materia prima para a súa industria láctea, mentres que, na actualidade, as importacións céntranse en lácteos de baixo valor engadido, como queixos procedentes de Alemaña ou dos Países Baixos.
A campaña “Te lo agradece” ten unha forte presenza na TV convencional, TV dixital e Social Video con anuncios e accións especiais nos últimos meses de 2024. Tamén inclúe microespazos na radio e un amplo despregue de pezas no punto de venda ao longo deste ano (Eroski, El Corte Inglés-Hipercor, Ahorramás e Carrefour) e accións de comercio electrónico nas plataformas de Carrefour, Día, Ahorramás e Amazon Fresh. Unha campaña potente, que pretende superar os 250 millóns de contactos e que afronta agora a súa segunda onda.
“Para identificar a orixe nacional dos produtos, só temos que fixarnos nos envases, que deben identificar a orixe. Tamén podemos buscar o logo 3 lácteos ao día, que é a recomendación de consumo medio aconsellado durante todas as etapas da vida para asegurar unha vida saudable e previr enfermidades”, precisou a directora xerente de Inlac.
A forte entrada de leite e lácteos foráneos motivou a preocupación do sector, levando a cabo iniciativas que poñen en valor os alimentos de orixe nacional, como amosa o lanzamento da campaña “Te lo agradece”. En 2023 comercializáronse en España un total de 893.000 toneladas procedentes do estranxeiro, o dato máis alto dos últimos 10 anos, por valor de máis de 2.727,5 millóns de euros.
Con datos máis recentes, no período comprendido entre xaneiro e abril de 2024, pódese observar que as importacións aumentaron en volume (+0,80 % e 292.578 toneladas), de acordo co último informe de comercio da Inlac, por valor de 898,58 millóns de euros (-0,38 %). En canto ao consumo global nos fogares, o último panel do MAPA constata que os españois compraron un 3,9 % menos de leite e derivados lácteos en marzo de 2024 e, a peche do ano móbil comprendido entre abril de 2023 e marzo de 2024, a diminución da compra de leite e derivados quedou no 1 %.
