A conselleira de Educación, Universidade e Formación Profesional da Xunta de Galicia, Carmen Pomar, e o responsable de RRHH de Nestlé na fábrica de Pontecesures (Pontevedra), José Manuel Carregal, asinaron un convenio de colaboración polo que o centro de produción acollerá estudantes de FP Dual o próximo curso académico.
A factoría galega formará a estudantes que cursen o Ciclo Formativo de Grao Superior de Mecatrónica Industrial no IES Fermín Bouza Brey, de Vilagarcía de Arousa. Así, os alumnos de FP Dual alternarán a súa formación lectiva no centro educativo coa recibida no centro de produción. Precisamente esta última desenvolverase entre os meses de marzo e agosto e alargarase durante os tres anos que cursen os seus estudos.
Durante a formación dos mozos na fábrica de Pontecesures, estes recibirán unha retribución económica mensual que percibirán a través da Fundación Empresa-Universidade Galega (FEUGA).
Nestlé continúa coa súa aposta polo emprego e a formación a través do seu Global Youth Initiative: Nestlé needs YOUth, programa que impulsa desde 2014 co obxectivo de ofrecer oportunidades, tanto laborais como educativas, a mozos menores de 30 anos.
Desde que se lanzase esta iniciativa, máis de 2.500 mozos beneficiáronse das oportunidades laborais e formativas proporcionadas por Nestlé. Ademais, desde os seus inicios, preto de 400 estudantes de FP Dual xa desenvolveron as súas prácticas de formación nos centros da compañía en Esplugues de Llobregat (Barcelona), Xixón, Xirona, La Penilla de Cayón (Cantabria), Sebares (Asturias) e Alovera (Guadalaxara).
