Entre os días 27 e 29 de novembro, a Asociación de Produtores de Leite de Portugal (Aprolep) levará a cabo o “Top Milk Tour” en Galicia, un evento exclusivo para os seus socios co obxectivo de coñecer de preto as vantaxes da muxidura robotizada. Durante estas tres xornadas, os participantes terán a oportunidade de visitar diversas gandarías galegas que empregan robots de muxidura das marcas DeLaval, Gea e Lely.
As visitas comezarán o 27 de novembro en tres granxas equipadas con tecnoloxía DeLaval: Gandaría Varela SC, Granxa Grixeira SC e Granxa Nelan SC. Nestes negocios, os participantes poderán observar non só o funcionamento dos robots de muxidura, senón tamén outras tecnoloxías aplicadas para optimizar a eficiencia e a produción.
A xornada do 28 de novembro estará dedicada a coñecer a tecnoloxía de Gea en Casa Eiras e en Batalla, ambas equipadas con robots de muxidura da marca, e en Rubio Busto, que conta cun sistema de muxidura por quendas ou batchmilking.
O último día do tour estará centrado en tres granxas que utilizan robots de muxidura de Lely: SAT Lodos e Pérez, SAT As Pandas e Gandaría Pazos. Esta última dispón, ademais, do robot de alimentación Lely Vector.
Esta experiencia representa unha oportunidade para os socios de Aprolep, que poderán avaliar de primeira man os beneficios da tecnoloxía avanzada na muxidura robotizada e o seu impacto na produtividade e no benestar animal.
As prazas son limitadas debido á capacidade do autobús. As inscricións están suxeitas a confirmación, teñen un custo de 165 euros por persoa en habitación dobre (con posibilidade de habitación individual cun suplemento de 60 euros) e inclúen transporte, aloxamento, visitas e comidas. Ademais, establécese un custo adicional de entre 10 e 20 euros por persoa para o equipo de protección necesario durante as visitas, como batas e botas.
