A Mostra Exposición de Muimenta (Moexmu) continúa avanzando na organización da súa XLII edición, que se celebrará do 10 ao 12 de abril de 2026 no recinto feiral Manuel Vila de Muimenta (Cospeito, Lugo). A cita acollerá o XXXIV Concurso Autonómico da Raza Frisona Fefriga, xunto co XL Concurso de Gando Frisón da Moexmu.
O encargado de valorar os exemplares participantes será Julián Rodríguez Pérez, gandeiro asturiano natural de Luarca e propietario da gandería Casa Flora. Tras formarse e incorporarse á granxa familiar, dedicouse plenamente á actividade gandeira, obtendo o título de Mestre Criador en 2006 e novamente en 2019.
A súa afección polos concursos comezou de neno e, desde entón, participou habitualmente en certames nacionais e internacionais, logrando distincións como Mellor Criador Nacional en 2017 e Mellor Rabaño Nacional en 2017 e en 2020.
Como xuíz oficial de Conafe iniciou a súa traxectoria en 2023 e desde entón xulgou concursos en distintos puntos de España como Nava (Asturias), Alaior (Menorca), Lalín (Pontevedra), Dos Torres (Córdoba) ou Treceño (Cantabria).
O programa inclúe, o venres 10, o concurso de novos preparadores; e o domingo 12, o certame de novos manexadores e a tradicional subasta de gando. O sábado 11 resérvase para o certame autonómico e para o concurso da Moexmu. O prazo de inscrición para ambos permanecerá aberto ata o 2 de marzo.
