Este xoves 17 de xullo celebrarase na parroquia de Oíns, en Arzúa (A Coruña), unha xornada centrada na redución de fitosanitarios no cultivo de millo mediante escarda mecánica. A actividade está dirixida ás persoas vinculadas profesionalmente cos sectores produtivos relacionados coa agricultura, gandería, industria agroalimentaria e cadea forestal-madeira, ou con expectativa de incorporación, en especial mozos e mozas do medio rural galego.
A xornada, organizada pola Xunta de Galicia, arrancará ás 10:30 horas coa inauguración oficial. Posteriormente, presentarase o ensaiado nos últimos anos, facendo fincapé na preparación do terreo coma clave do éxito, problemas xurdidos e solucións implementadas. Seguidamente, amosaranse os equipos e, a continuación, haberá demostracións prácticas da aixada rotativa arrastrada, da binadora e da gradilla de púas. O encontro rematará ao redor das 14:30 horas, logo da posta en común de impresións entre os asistentes.
A política agraria europea leva anos establecendo unha liña de produción sostible e respectuosa co medio ambiente. Con esta acción, preténdese realizar unha demostración coa maquinaria específica para reducir ou evitar o emprego de fitosanitarios no cultivo do millo, aínda que se podería extrapolar a outros cultivos.
