A oitava edición do Concurso Rexional da Raza Frisia do Alto Minho, no que participaron un total de oito ganderías da zona, tivo lugar os días 17 e 18 de febreiro no municipio portugués de Ponte de Lima.
Saíron á pista uns 70 animais procedentes de explotacións de Ponte de Lima, Barcelos, Celorico de Basto e Vila Nova de Famalicão.
O xuíz, Santiago García Souto, outorgoulle o primeiro dos títulos, o de xata campiona, a Pereira Byway-MB Stanley 6, da gandería Vilas Boas & Pereira. O recoñecemento de xovenca campiona e posterior xovenca gran campiona foi para Encanto Mascalese 494, da gandería Encanto Natural.
Esta mesma explotación logrou o premio ao mellor conxunto e ademais o título principal do concurso, o de vaca gran campiona, logrado grazas á súa frisona Encanto Sid 362.
