Desde o 1 de xuño están abertas a subscrición as liñas de seguro de gando para a campaña 2019 de Agroseguro, as cales dan cobertura a todas as especies (bovino, equino, ovino, caprino, porcino, cunícola e avícola) fronte os principais riscos que afectan as explotacións.
Para esta campaña, os seguros de gando manteñen a posibilidade de fraccionar o pago da prima e incorporan a domiciliación do abono de sinistros, así como do pago da prima e das súas regularizacións.
En concreto, o seguro de gando vacún de reprodución e produción, que permite incluír na mesma declaración a garantía de retirada e destrución de animais mortos na explotación (ReD), é o que máis contratan os gandeiros. Destaca a subscrición no gando vacún de leite, cunha implantación próxima ao 60%, e a garantía de saneamento gandeiro como a cobertura mellor valorada entre os produtores.
En 2018 este seguro deu cobertura a máis de 1,5 millóns de animais, cun capital asegurado superior aos 1.750 millóns de euros. Galicia é a comunidade autónoma con maior número de explotacións e animais asegurados, seguida de Castela e León, Cataluña, Asturias e Cantabria.
