Andrés Fernández é o novo presidente da Asociación Empresarial Española de la Industria de Sanidad y Nutrición Animal, sucedendo no cargo a Juan Carlos Castillejo, segundo acordo adoptado na última reunión da xunta reitora da patronal, celebrada onte mediante videoconferencia debido á situación sanitaria pola que atravesa o país a consecuencia da covid-19.
Fernández é director xeral de CZ Veterinaria desde 2004, conselleiro delegado de Biofabri e CEO do Grupo Zendal. É licenciado en Ciencias Empresariais pola Universidade de Vigo e MBA na IEDE Business School de Madrid. Ao longo da súa carreira profesional ten ocupado diversos postos de responsabilidade no sector químico e farmacéutico, ademais de ser membro do Círculo de Empresarios de Galicia e do consello de administración de CZ Vaccines na localidade pontevedresa do Porriño e, ata este nomeamento, vicepresidente de Veterindustria.
Doutra banda, a xunta reitora tamén elixiu ao novo vicepresidente da Asociación, Pablo Muniesa, licenciado en Veterinaria pola Universidade de Zaragoza e Máster en Administración e Dirección de Empresas no IEDE Business School de Madrid. Nos últimos anos ocupou diversos postos de responsabilidade a nivel nacional e internacional na compañía Elanco Animal Health. Na actualidade é o director xeral de Elanco Iberia para España e Portugal.
