O Consello de Ministros, por proposta do Ministerio de Agricultura, Pesca e Alimentación, aprobou hoxe senllos reais decretos sobre sanidade animal que establecen as obrigas de vixilancia dos titulares das ganderías e aproban a voluntariedade de que dispoñan dun veterinario, un plan sanitario integral e un plan de benestar dos animais.
Estes requisitos, que tiñan carácter obrigatorio no Real Decreto 364/2023, do 16 de maio, pasan agora a ser voluntarios para as granxas co obxectivo de dar cumprimento aos acordos sobre sanidade animal acadados polo Goberno e as organizacións agrarias Unión de Pequenos Agricultores e Gandeiros (UPA) e Unión de Unións de Agricultores e Gandeiros para flexibilizar a actividade e restar carga burocrática ao sector.
Coa finalidade de acadar a congruencia plena entre todas as normas de ordenación do sector gandeiro coas obrigas sanitarias xerais establecidas neste novo real decreto, o Consello de Ministros aprobou unha segunda norma do mesmo rango para modificar as tres específicas que rexen as explotacións bovinas, porcinas e avícolas. Estas normas de ordenación incluirán a partir de agora tamén a voluntariedade de dispoñer dun veterinario de explotación e eliminan a obrigatoriedade do plan sanitario integral e do plan de benestar animal.
