O equipo de Vaca TV retransmitirá esta fin de semana todos os detalles da 42.ª edición do Concurso Nacional da Raza Holstein Frisia de Portugal, que se celebra este sábado e domingo 6 e 7 de setembro, no marco da AgroSemana, Feira Agrícola do Norte.
O certame, organizado pola Associação Portuguesa dos Criadores da Raça Frísia (APCRF) co apoio técnico da ABLN e da EABL e a colaboración de Agros – União das Cooperativas de Produtores de Leite de Entre Douro e Minho e Trás-os-Montes UCRL, reunirá arredor de 150 animais.
O sábado, ás 15:00 h (hora portuguesa, 16:00 en España) será a quenda para as xatas e xovencas e o domingo, ás 13:30 h (hora portuguesa, 14:30 en España) sairán á pista as vacas, entre as que participará a vixente gran campioa, Pereira Undenied Alxina.
O italiano Giuseppe Beltramino, con máis de 25 anos de experiencia no xuízo vacún por diferentes lugares do mundo, será o xuíz encargado de valorar as características dos exemplares.
