O Cetal, en colaboración con Vacas da Ulloa, PSVet Dairy Quality, 2xMil e Data Monitoring, organiza a xornada de presentación de resultados do proxecto "Control de procesos usando tecnoloxías de internet para a conservación do leite nas explotacións gandeiras". A xornada está dirixida a profesionais do sector lácteo, empresas e industrias lácteas, investigadores e profesionais relacionados co sector agrario e o desenvolvemento rural.
A xornada comezará ás once da mañá no salón de actos do Cetal coa presentación do acto por parte do director xeral do centro, Javier Bueno. A continuación Natalia Estévez, da empresa Proquimia SA, impartirá un relatorio titulado “Técnicas de limpeza de tanques de frío”. Tras ela, os representantes das cinco entidades participantes no proxecto explicarán os principais fitos no desenvolvemento dos traballos realizados, así coma os resultados obtidos máis destacados. Ao final da exposición os asistentes poderán debater sobre as utilidades dos resultados do proxecto na conservación do leite nos tanques de frío.
O proxecto "Control de procesos usando tecnoloxías de internet para a conservación do leite nas explotacións gandeiras" foi aprobado no ano 2018 dentro da convocatoria de axudas para a execución de proxectos dos grupos operativos da Asociación Europea da Innovación (AEI), cofinanciadas co Fondo Europeo Agrícola de Desenvolvemento Rural (Feader) no marco do programa de desenvolvemento rural (PDR) de Galicia 2014-2020. O grupo operativo está formado por Vacas da Ulloa SCG como coordinadora do grupo, a empresa Grupo PSVet Dairy Quality SL, a empresa 2xMil SCG, a empresa Data Monitoring SA e a Fundación Centro Tecnolóxico Agroalimentario de Lugo (Cetal). Este grupo traballou para crear un dispositivo denominado DATALACT e valorar a súa aplicabilidade no control da calidade hixiénica do leite no tanque de frío.
Tras a finalización do proxecto polo grupo operativo organízase esta xornada de difusión para compartir tanto o produto xerado como as súas diferentes aplicacións con todas aquelas persoas interesadas.
A asistencia é gratuíta.
