A Escola de Industrias Lácteas de Zamora (Eilza) abre o prazo de inscrición da súa nova formación gratuíta: "Gandería 4.0: innovación e xestión eficiente da granxa", que comezará o 1 de setembro. O curso está dirixido a mulleres, máis concretamente a gandeiras que xa estean a desenvolver a súa actividade no sector, xa sexa en ganderías propias, familiares ou por conta allea, e tamén para mulleres que queiran incorporarse ao sector gandeiro. Para participar, é requisito imprescindible residir en Castela e León.
O curso terá unha duración de 152 horas, en modalidade virtual, e inclúe 16 horas de prácticas, que consistirán en dúas xornadas de visitas a granxas punteiras, que teñan implementadas innovacións relacionadas cos obxectivos e contidos do curso. O programa estrutúrase en tres bloques temáticos e en cada un deles hai varios módulos de duración máis curta co fin de que cada alumna se anote nos bloques ou módulos que máis lle interesen. Polo tanto, as inscricións poden facerse para o programa completo, a un e/ou dous bloques temáticos ou a módulos independentes.
O obxectivo da formación consiste en dotar ás participantes de ferramentas e coñecementos que lles permitan implementar medidas destinadas a optimizar a rendibilidade das súas ganderías, aplicar prácticas sostibles co medio ambiente e de benestar animal, incrementar de forma práctica os coñecementos sobre a xestión empresarial da granxa que lles faciliten a toma de decisións e optimizar os tempos de dedicación ao traballo e mellorar as condicións laborais do persoal empregado.
