A Asociación EFA Fonteboa presentou o programa de formación para o segundo cuadrimestre de 2025, período no que varios estudantes da Escola se atopan en estadías profesionais en Francia, Irlanda e Italia. Así mesmo, a EFA acolle alumnado de Normandía, Borgoña e Pays de la Loire.
Entre as actividades planificadas en relación co vacún leiteiro, destaca o curso centrado na súa alimentación. Celebrarase o 14 e o 15 de maio, desde as 15:00 h ata as 20:00 h.
Nesta formación afondarase nos coñecementos sobre os nutrientes, os requirimentos nutricionais, a formulación das racións, o manexo do potencial produtivo dos pastos e o deseño de estratexias para optimizar os rendementos. Contarase coa colaboración das empresas 3F Technology, Progando e Kersia. Está dirixido a estudantes de Gandaría e Asistencia en Sanidade Animal, aínda que tamén poden participar profesionais do sector.
O programa tamén inclúe a conmemoración do Día Mundial do Leite, arredor do 1 de xuño organizaranse diversas actividades divulgativas. O 29 de maio está previsto que se realicen no centro obradoiros sobre derivados lácteos, coa finalidade de poñer en valor o leite, divulgar os seus valores nutritivos e as súas posibilidades culinarias.
En colaboración con Limagrain Ibérica, establecerase a Área de Experimentación de Cultivos, nunha parcela anexa á EFA. Nunha superficie de media hectárea implementaranse cultivos de cereais e pratenses con finalidade didáctica: realizar labores de cultivo, seguimento vexetativo, incidencias fitopatolóxicas e avaliación de rendementos. Esta primavera comeza o proxecto cos cultivos de millo, trigo e cebada. No outono continuará con pratenses de forraxeiras de inverno.
Ademais, desenvolverase neste período o programa de formación práctica no apiario, un curso de motoserra, unha visita a The Navigator Company en Aveiro e unha xornada sobre a comercialización hortofrutícola.
