Cancelada a Agrosemana 2020

En vista da situación epidemiolóxica do novo coronavirus SARS-CoV-2, causante da covid-19, o Goberno portugués aprobou o pasado 19 de maio un proxecto de lei que determina a prohibición da celebración de grandes eventos ata o 30 de setembro de 2020, o que implica a correspondente cancelación da oitava edición da AgroSemana, que tería lugar do 3 ao 6 de setembro no Espaço AGROS de Póvoa de Varzim (Portugal).

No seu comunicado oficial, o Grupo AGROS –organizador do evento– asegura ter “un plan de continxencia baseado nun rigoroso conxunto de medidas de control, prevención e protección que cumpren con todas as recomendacións da Dirección Xeral de Saúde”; porén, a medida do Goberno ten como obxectivo minimizar calquera risco de contaxio e/ou propagación da covid-19, o que implica que non todo o mundo podería gozar deste multitudinario encontro agrogandeiro, tendo en conta, ademais, o insuficiente coñecemento que aínda existe sobre a enfermidade e a súa evolución no futuro.

Así mesmo, o Grupo AGROS anuncia que a 8.ª Agrosemana-Feira Agrícola do Norte terá lugar entre o 2 e o 5 de setembro de 2021 no seu marco habitual de celebración: o Espaço AGROS de Póvoa de Varzim.