A doutora en veterinaria Azucena Mora foi beneficiaria do premio do Plan Nacional de Resistencia aos Antibióticos (PRAN) á mellor iniciativa de investigación. A catedrática da Facultade de Veterinaria de Lugo (Universidade de Santiago de Compostela) presentou un proxecto co título: Monitorización integrada do fluxo de resistencias a antimicrobianos (RAM) e dianas de intervención "do medio ambiente, á granxa e á mesa".
É a segunda vez que estes galardóns recoñecen a labor desta especialista en microbioloxía. En 2019, foipremiada xunto ao seu compañeiro Jorge Blanco, pola mellor publicación científica.
Nesta edición dos Premios PRAN foron recoñecidos nove proxectos desenvolvidos no ámbito da loita contra o problema da resistencia aos antimicrobianos. No proceso avaliáronse máis de 70 candidaturas, tendo en conta a metodoloxía utilizada, os resultados obtidos, a continuidade prevista, as sinerxias establecidas e o nivel de innovación de cada proxecto.
A Axencia Española de Medicamentos e Produtos Sanitarios, adscrita ao Ministerio de Sanidade, convocou por cuarta vez estes galardóns. Segundo a entidade, foron creados co obxectivo de dar visibilidade a aquelas iniciativas consideradas exemplares e que contribuíron á consecución das metas propostas na estratexia nacional fronte á resistencia bacteriana.
Esta condecoración a Azucena Mora coincide coa súa toma de posesión da cadeira n.º 21 da Academia de Ciencias Veterinarias de Galicia. O acto celebrarase o xoves 31 de outubro ás 17:30 h na Deputación Provincial de Lugo.
