Africor Lugo recoñece ás mellores ganderías da provincia por produción, morfoloxía e índices xenéticos

Africor Lugo entregará o próximo 29 de xuño en Lugo os galardóns ás mellores ganderías da provincia, un recoñecemento anual co que a entidade destaca o traballo das explotacións máis sobresaíntes en produción, morfoloxía e índices xenéticos.

Para formar parte desta selección, as ganderías deben situarse entre as cen mellores da provincia en cada un destes apartados, o que reforza o mérito das explotacións distinguidas e pon en valor a súa aposta pola mellora do rabaño, a eficiencia produtiva e a calidade xenética.

Entre as ganderías recoñecidas figuran Casa do Rego, de Láncara; Zorro, Neiras e Agustín, de Sarria; Tendeiro, do Páramo; Varela, de Castroverde; Lodos e Pérez, da Pastoriza; Casanova, de Baleira; Campolongo, de Carballedo, e Casa de Roca, de Guitiriz.

Ademais, Africor Lugo concederá mencións especiais a Rodasinde, do Saviñao, pola maior produción media de leite por vaca, con 16.809 quilos; a Mantoño Holstein, de Barreiros, pola mellor media de cualificación morfolóxica, con 89,13 puntos, e a SAT Agosto Darriba, da Pastoriza, polo mellor índice xenético, cun ICO de 1.190.