A Subdirección Xeral de Producións Gandeiras e Cinexéticas, dependente da Dirección Xeral de Producións e Mercados Agrarios do Ministerio de Agricultura, Pesca e Alimentación, vén de publicar o Informe de Declaracións de Entregas de Leite Cru aos Primeiros Compradores correspondente a setembro. No documento reflíctese un prezo medio do leite en España de 0,529 €/litro no noveno mes do ano.
O valor supón un incremento de máis dun céntimo con respecto ao mes anterior e é superior ao rexistrado en setembro de 2024 (0,480 €/litro). A cifra é a máis alta do último ano, xa que ata o momento non se superaran os 0,519 €/litro (marcados precisamente en agosto).
En canto ao volume de produción mensual, o informe mostra un aumento con respecto ao mesmo período do ano pasado. Mentres en setembro de 2024 se declararon 581.889 toneladas de leite, no de 2025 a cifra situouse en 588.332 toneladas.
Pola súa parte, as comunidades autónomas que presentan un prezo máis alto en setembro foron Canarias (0,638 €/litro), Comunidade Valenciana (0,546 €/litro) e Castela e León (0,545 €/litro). Pola contra, os valores máis baixos corresponderon a Navarra e Galicia (0,521 €/litro), Cataluña (0,513 €/litro) e Illas Baleares (0,470 €/litro).
