A Subdirección Xeral de Producións Gandeiras e Cinexéticas, dependente da Dirección Xeral de Producións e Mercados Agrarios do Ministerio de Agricultura, Pesca e Alimentación, vén de publicar o Informe de Declaracións de Entregas de Leite Cru aos Primeiros Compradores correspondentes ao mes de agosto. No documento rexístrase un prezo medio do leite en España de 0,519 €/litro no oitavo mes do ano.
O valor supón un incremento de máis dun céntimo con respecto ao mes anterior e é superior ao fixado en agosto de 2024 (0,473 €/litro). A cifra é a máis alta do último ano, xa que ata o momento non se sobrepasaran os 0,502 €/litro (marcados en maio e xullo).
En canto ao volume de produción mensual, o informe reflicte un lixeiro aumento con respecto ao mesmo período do ano pasado. Mentres en agosto de 2024 se declararon 600.426 toneladas de leite, no de 2025 a cifra sitouse nas 603.795 toneladas.
Pola súa parte, as comunidades autónomas que fixaron un prezo máis alto en agosto foron Canarias (0,637 €/litro), Asturias (0,534 €/litro) e Andalucía e Castela e León (0,532 €/litro). Pola contra, o prezo máis baixo correspondeu ás Illas Baleares (0,470 €/litro), Galicia (0,507 €/litro) e Aragón (0,509 €/litro).
