Os prezos dos produtos lácteos na Unión Europea a peche de ano seguían en positivo. O valor do leite desnatado en po, o queixo e a manteiga continuou aumentando. A porcentaxe de incremento para o leite desnatado en po foi dun 2,8 %; para o queixo, dun 0,3 %, e para a manteiga, dun 0,8 %. Tan só caeu o prezo do leite enteiro en po nun 1,1 %.
Ademais de manterse a tendencia alcista na maioría dos produtos, as entregas de leite na UE durante 2022 (de xaneiro a decembro) igualáronse ás rexistradas en 2021. Os datos da UE reflicten tamén un novo aumento dos custos dos pensos (+3 %) e unha disminución dos custos da enerxía (-4,6 %).
Desde a Dirección Xeral de Agricultura e Desenvolvemento Rural da Comisión Europea apuntan que entre todos os produtos lácteos, só a produción de nata da UE podería crecer, absorbendo unha gran parte da dispoñibilidade de graxa. A anticipación de custos de procesamento aínda máis altos para o secado de leite en po probablemente podería cubrir parte da escaseza actual de manteiga, pero espérase que a produción diminúa. A produción de queixo da UE podería converterse novamente nunha opción preferida, impulsada polos altos prezos, mentres que tanto as exportacións como o uso interno mantéñense estables.
Consideran tamén que a competitividade dos leites en po da UE vese afectada polos altos prezos que prevalecen, o que obstaculiza as exportacións e, por tanto, impide o crecemento da produción a pesar do crecemento positivo do soro e o uso interno de leites desnatados en po.
Os expertos da Comisión Europea advirten que o comezo de 2023 podería seguir sendo un desafío para os gandeiros europeos ao facer fronte aos altos custos dos insumos e o que probablemente sexa unha demanda máis débil. Supondo condicións climáticas normais, espérase que o crecemento do rendemento sexa lixeiramente superior (0,6 %) e poida compensar unha maior redución no rabaño leiteiro (-0,8 %). Como resultado, a recollida de leite na UE podería caer modestamente, nun 0,2 %.
