Ganadería en Feminino, o proxecto de Zoetis para a visibilización da muller no ámbito gandeiro que celebra este ano a súa segunda edición, ten como un dos seus alicerces fundamentais a formación, tanto en aspectos técnicos relacionados coa produción das principais especies de abasto, como naqueles orientados á mellora das habilidades empresariais e de xestión.
Dentro do programa formativo deste ano, entre marzo e xuño, celebráronse cinco seminarios online nos que se rexistraron preto de 500 profesionais.
Durante o primeiro deles, centrado no programa de adestramento en detección precoz de enfermidades en porcino, Ester Maiques, técnico de porcino de Zoetis, explicou como recoñecer os primeiros síntomas de enfermidade, ofrecendo algunhas pautas para a mellorar a saúde e o benestar dos animais e, por tanto, para reducir o uso de antibióticos na explotación.
Tres foron os seminarios enfocados en vacún de leite durante este período. No primeiro interveu como relatora Eugenia Peralta, técnico de Ruminantes de Zoetis, que falou sobre a terapia de secado selectivo como mellor opción no manexo da mamite. O segundo, contou con Fernando Soberón, de StandarDairyConsultants, como relator. Baixo o título "Cantidade ou calidade, que é mellor para a miña recría?", detalláronse aspectos fundamentais para a optimización da estratexia de recría de xovencas, con atención ao aumento da produtividade e rendibilidade da explotación. O último destes seminarios enfocados a vacún de leite, coorganizado por Clun-Mulleres de Seu, organización que apoia o proxecto Ganadería en Feminino, centrouse en aspectos relacionados coa calidade de leite e a alimentación con robots de muxido e contou con José Antonio González, enxeñeiro agrónomo da Cooperativa Os Irmandiños, e José María Hernandorena, consultor veterinario de vacún de leite, como relatores. Durante as súas respectivas intervencións repasaron os diferentes tipos de muxido robotizado, aqueles conceptos básicos sobre a alimentación de precisión con robots que hai que ter en conta e os puntos clave no control da mamite.
Tampouco faltaron no programa formativo de Ganadería en Feminino seminarios dedicados a temas relacionados coa xestión e comercialización das producións, como o presentado por Chus Catalina, consultora sénior de Márketing, sobre comercio electrónico, unha realidade ao alcance do sector gandeiro.
