A empresa familiar catalá Torre Santamaría, situada en Balaguer (Lleida), convértese na primeira granxa de leite de vaca capaz de utilizar o 100 % dos seus residuos orgánicos na xeración de enerxías renovables. Cun investimento próximo ao catro millóns de euros, este proxecto pioneiro foi posible grazas á firma con Axpo do primeiro acordo de compravenda de biometano a longo prazo en España e ao compromiso do Grupo Lactalis, a quen a granxa entrega o seu leite desde hai 30 anos na súa fábrica de Mollerusa.
En 2011 a granxa xa instalou unhas das primeiras plantas de biogás (dixestores), capaz de descompor o esterco xerado polas vacas e xerar biogás para abastecer as necesidades de electricidade, calefacción e auga quente da propia granxa.
Agora, a través desta ampliación das súas instalacións de produción de enerxía renovable e a súa modernización mediante a incorporación do proceso de enriquecemento de biogás, o esterco xerado polas vacas poderase descompor para xerar biometano, que servirá para inxectalo na rede de distribución de Nedgia e ser utilizado onde se queira dentro de Europa. O uso do biometano como combustible alternativo sustentable xogará un papel fundamental na redución de emisións de efecto invernadoiro na loita contra o cambio climático.
Tras a firma do acordo, o director xeral de Axpo Iberia, Ignacio Soneira, sinalou a importancia deste tipo de contratos de compravenda a longo prazo para desenvolver proxectos viables de biometano: “Axpo foi o primeiro operador en comercializar biometano en España en 2015 e este innovador proxecto marca sen dúbida un novo fito na nosa aposta por un combustible de orixe 100 % renovable que contribuirá ao cumprimento dos obxectivos de sustentabilidade marcados por Europa para 2030”. “Estamos moi orgullosos de ofrecer solucións enerxéticas de orixe 100 % verde e colaborar na construción dun mundo máis sustentable”, engadiu.
A granxa Torre Santamaría sempre se mantivo á vangarda en temas ambientais. Foi pioneira na implantación xenética A2, en 2019 converteuse na primeira explotación leiteira que o Grupo Lactalis certificou en benestar animal (Welfair™) en Cataluña e, con este novo investimento, converterase no máximo expoñente da economía circular do sector primario. Cunha media anual de 22 millóns de litros de leite ao ano, leva tres décadas colaborando co Grupo Lactalis, quen envasa o seu leite en Mollerusa baixo as marcas El Castillo ou Puleva.
En palabras do conselleiro delegado do Grupo Lactalis en España, Ignacio Elola Zaragüeta, “desde Lactalis estamos convencidos de que este tipo de investimentos ambientais son un exemplo do que nos depara o futuro para o sector lácteo e seguiremos apoiando o paso dado polos responsables de Torre Santamaría grazas a unha colaboración de longo prazo. Polo noso lado, seguimos traballando na sustentabilidade do campo e da materia prima, mellorando o seu transporte, recollendo o leite nun perímetro próximo ás plantas e optimizando as nosas rutas co fin de reducir emisións”.
