Durán Maquinaria Agrícola acaba de converterse no novo importador en exclusiva para España da marca Samson, especialista en cubas, esparcidores e batedores de xurro, ademais dalgún outro equipo para a gandería e a agricultura.
Con sede central na localidade de Viborg, ao norte de Dinamarca, Samson está presente no mercado da maquinaria agrícola desde 1943, especializándose, a partir dos anos 60, na fabricación e a comercialización de cubas para xurro. A día de hoxe e tras adquirir en 2019 a actividade de Pichon, o Grupo Samson está focalizado nunha gama de produtos que inclúe, ademais de cubas, batedores de xurro, esparcidores e equipos de valorización.
Samson conta con dúas delegacións máis en Francia (Landivisiau) e Polonia (Wołczyn), un total de 474 empregados e unhas cifras de facturación que se duplicaron nos últimos dous anos, superando en 2020 os 90 millóns de euros.
Ofrécelle aos seus clientes dúas gamas de cubas de esterco, a Gama PGII, de 16.000 a 35.000 litros, e a Gama TG, de 18.000 e 20.000 litros; outras dúas de esparcidores, Flex, de 16 a 23 m3, e US, de 23 a 35 m3, e a versión RV 150 de batedores de xurro.
Con 80 anos de experiencia ao servizo da mellora das técnicas de esparexemento, na actualidade Samson está presente en case todo o mundo, e agora tamén en España, de cuxa importación en exclusiva e distribución se fará cargo Durán Maquinaria Agrícola.
Un dos alicerces fundamentais da compañía é, ademais da fabricación, o mantemento das súas máquinas, o que implica unha alta reacción técnica e, sobre todo, atención ao cliente, respondendo con rapidez ás solicitudes máis esixentes.
