No día de hoxe, véspera do Día Mundial do Leite, Río de Galicia organizou un acto co que poñer en valor o papel determinante das mulleres para o sector lácteo de Galicia e a supervivencia do entorno rural. A marca de leite 100 % galega, que pertence ao Grupo Lence, presentou a campaña "Actitude Río: Puro coraxe". Con esta, ponse en valor o traballo das mulleres no rural. Dita campaña poderase ver na web de Río de Galicia, nas súas redes sociais e tamén a través dun código QR que estará nos envases de leite.
O evento en cuestión celebrouse na Fundación Juana de Vega de Oleiros (A Coruña) e contou coa participación nunha mesa redonda de Silvestre José Balseiros, director xeral de Gandería, Agricultura e Industrias Agroalimentarias da Xunta; Elena Mancha Montero de Espinosa, directora xeral de Relacións Laborais da Xunta; Gabriela González, directora de Sustentabilidade e Comunicación Corporativa de Vegalsa-Eroski, e Carmen Lence, CEO de Grupo Lence. Por suposto, tamén estiveron presentes as gandeiras da campaña da compañía.
A través da participación no acto das gandeiras da campaña e do resto dos relatores, a compañía subliñou o peso das mulleres do rural para asumir os negocios do sector, ao tempo que destacaron a fortaleza do sector lácteo galego, a súa hexemonía no consumo a nivel nacional e a importancia deste produto na alimentación básica de millóns de fogares.
