MSD Animal Health puxo en marcha unha nova edición do seu Plan Avanza Recría, un programa co que a compañía reforza a súa aposta pola formación práctica de mozos veterinarios especializados en ruminantes e, en particular, en vacún de leite.
A iniciativa, impulsada polo equipo de Ruminantes, suma xa doce edicións e permitiu formar máis de 200 profesionais ao longo dos últimos anos. O obxectivo é achegar aos veterinarios que inician a súa carreira á realidade das granxas, combinando módulos teóricos, contidos dixitais e obradoiros prácticos en explotacións gandeiras.
Nesta edición, unha das sesións celebradas en Saldaña (Palencia) centrouse na ecografía pulmonar en tenreiras, unha ferramenta útil para o diagnóstico precoz de patoloxías respiratorias. Os asistentes puideron traballar co ecógrafo na granxa, aprender a interpretar imaxes e incorporar esta técnica aos protocolos de prevención e manexo da recría.
Segundo destacou Ángel Revilla, director do equipo de Ruminantes e Tecnoloxía de MSD Animal Health en España, a formación en saúde, manexo de tenreiras e benestar animal resulta clave para mellorar a produtividade, avanzar en sustentabilidade e favorecer unha remuda xeracional cualificada nas explotacións de vacún de leite.
