A correduría de seguros Ucoga anuncia a incorporación de Martín Fernández como novo responsable de Negocio da compañía. Este nomeamento enmárcase dentro da estratexia de crecemento e fortalecemento do equipo de Ucoga, co obxectivo de seguir ofrecendo un servizo de excelencia aos seus clientes e socios.
Fernández conta cunha ampla traxectoria no sector asegurador, que sobresae pola súa capacidade de liderado e o seu enfoque no desenvolvemento de oportunidades de negocio. A súa experiencia profesional abrangue case vinte anos, período no que ocupou cargos clave en recoñecidas empresas do sector.
O director xeral de Ucoga, Iván Novo, subliñou a importancia desta incorporación para o futuro da entidade: "Sentímonos moi motivados coa chegada de Martín Fernández ao noso equipo. A súa experiencia e visión do negocio, sumadas á vontade de crecemento e ao talento que caracteriza a Ucoga, forman unha combinación que nos permitirá acadar novas metas e consolidar a nosa posición no mercado".
Desde Ucoga aseguran que coa chegada de Fernández reforzan o seu compromiso de ofrecer solucións aseguradoras adaptadas ás necesidades dos seus clientes, ao apostar por un equipo humano altamente cualificado e por unha estratexia que impulse a mellora continua. "Confiamos en que o seu liderado e experiencia nos impulsen a seguir medrando xuntos", engadiu Novo.
