Lely ofreceu na Pastoriza (Lugo) unha completa xornada de portas abertas en SAT Lodos y Pérez na que os asistentes puideron coñecer todos os detalles do proceso de traballo desta gandería de referencia. Toda a información, en Vaca Pinta 37.
No marco incomparable dunha das mellores granxas de leite de Europa no que a produción e instalacións se refire, o xoves 16 de febreiro celebrouse en SAT Lodos y Pérez unha xornada de portas abertas levada a cabo por Lely coa colaboración de ABS, Piensos Rego, Lebriquim, Construcciones Coseco e SGMuiña. Esta explotación leiteira da provincia de Lugo cativou a todos os asistentes.
Centenares de persoas déronse cita na Pastoriza, onde puideron coñecer de primeira man como é a rutina dunha explotación que produce case 50 kg de leite por vaca e día nos seus tres robots de muxido Lely Astronaut A5. Entre as ganderías de España con rabaños superiores ás 150 vacas en muxido, esta é a que ten os mellores resultados de media por vaca, cunha produción total anual próxima ao millón de quilos producidos por robot.
UN EVENTO EXITOSO CON ASISTENTES VARIADOS
O encontro transcorreu baixo un sol practicamente primaveral e cunha temperatura moi agradable para ser o mes de febreiro, de case 18 graos centígrados, o que fixo que máis xente se animase a participar na xornada.
O público que acudiu foi maioritariamente galego, pero tamén houbo gandeiros das provincias veciñas de Asturias, León, Cantabria, Valladolid, Zamora... e xente que veu de Portugal e Cataluña só para ver como funciona esta gandería, destacable en canto a produción e singular na súa construción. A nave goza da altura máxima permitida, máis de once metros no punto máis alto, e está aberta polos seus catro lados, polo que ten unha ventilación envexable.
IMPRESIÓNS MOI POSITIVAS
Os asistentes finalizaron o día moi satisfeitos despois de poder coñecer a explotación. “Vexo unhas vacas moi ben coidadas, cunhas camas de area cómodas; non me estraña que produzan litros da maneira na que o fan”, comentaba un gandeiro asturiano. Outro, procedente de León, resaltaba tamén: “Vese que as vacas, ao poder circular de forma libre e muxirse cando queiran, producen máis litros de leite ao día, pero tamén hai que ter en conta que a granxa ten unha forraxe excepcional”.
Un visitante da provincia da Coruña destacaba, ademais, “paréceme unha grande idea non ter trabadizas para as vacas, véselles mellor á hora de acudir ao presebe e semella que o fan sen ningún tipo de medo. A única dúbida é no que respecta a saneamento e reprodución, pero vexo que o teñen todo moi controlado”. Outro gandeiro, do sur da provincia de Lugo, asegurou que “o que máis me chama a atención é o cow confort que hai dentro da cuadra, comodidade e amplitude a partes iguais. Vese tamén o rabaño moi tranquilo; ata un día coma o de hoxe con xente por aquí, as vacas están moi ao seu aire e acoden igual ao robot”.
Un participante da xornada, da provincia de Valladolid, apuntou que “se ve que os robots traballan ben, que os cuarteiróns quedan todos correctamente muxidos e que a vaca non sofre nada dentro do box, é máis, non é que non sufra, é que acode de maneira voluntaria ao robot unha vez tras outra. Creo que os Lely Astronaut non teñen competencia neste sector, son a mellor máquina”.
Durante o día, os asistentes puideron tamén gozar dunha comida a pé de granxa nunha carpa instalada especificamente para a ocasión, na que non faltaron nin o polbo nin o churrasco.
