Santi Crous é un dos socios desta gandería, na que moxen a 189 exemplares que producen uns 37,5 litros/vaca/día, cunha media de número de muxidos de 2,7.
“A granxa está moi ben deseñada, cos robots en cabeceira, con moito espazo diante e co bebedoiro”, explica Alberto Sánchez, responsable de vendas e márketing en Lely Center Los Corrales.
En dous dos robots teñen cama quente, con acceso para vacas de dous e máis partos. En total, moxen a 130 animais neses dous Astronaut. O terceiro destínase ás primíparas, que están en cubículos, con 60 exemplares: “Todas van ben ao muxido. Distribuímolo así por temas de espazo”, afirma o gandeiro.
Tamén contan cunha área de atrasos, que ocupa uns metros cadrados e onde non hai cubículos. Grazas a esta zona, Sánchez declara que é moi doado para os gandeiros meter aquelas vacas que requiren ser muxidas porque están ao final da lactación ou por unha situación de aprendizaxe; é dicir, aquelas que puntualmente necesitan que se muxan: “Con isto facilitamos o traballo do gandeiro”.
O Lely Astronaut A5 Next, polo miúdo
Sánchez apunta que, cando viu por primeira vez o Astronaut A5 Next, xa observou que era un robot máis rápido, limpaba mellor, realizaba menos movementos e era máis preciso ca o seu antecesor. Ademais, decatouse de que cometía menos fallos. Sánchez manifesta que “a tecnoloxía nos vai introducindo novidades que nos permiten ser máis eficaces. O Astronaut sempre foi o robot máis fiable do mercado, pero en Lely gústanos ir diminuíndo o número de erros e que a máquina sexa o máis segura posible”.
Santi Crous comparte a súa experiencia cos A5 Next: “Non sei como funcionan os outros modelos, pero nós estamos moi contentos. Puxémolos xuntos, cunha sala no medio e o certo é que vai moi ben para controlar as vacas e ter todo a man, incluídos os caldeiros para recoller o leite. Hai dous meses que os instalamos e funcionan ben”.
Outras solucións de lely
Ademais dos Astronaut, en Crous Cutrina adquiriron un Collector C2 para a limpeza dos corredores. Polo de agora só o utilizan nunha parte da gandería, porque aínda teñen que facer algunha obra: “A verdade é que funciona moi ben”, comenta Santi Crous.
Adicionalmente, levan traballando cun arrimador de comida Juno desde hai medio ano, que lles aforra moito traballo. Crous puntualiza que, deste xeito, o gando sempre ten o alimento preto, o cal agradecen.
Benestar animal co tráfico libre
Crous expresa que o que máis lle sorprendeu co cambio ao muxido automatizado é o carácter das vacas, xa que as ve moi tranquilas; están relaxadas e van muxirse cando queren: “Cando vén xente nin se inmutan, porque van á súa bóla”. Alba Crous, filla de Santi, que tamén forma parte da empresa familiar, engade que agora sempre están así e que nunca se estresan.
Os propietarios de Crous Cutrina escolleron os robots de Lely fronte a outras alternativas existentes porque “vimos que van un pouco máis avanzados ca os outros. Son moi funcionais, o brazo é resistente e iso convenceunos. Ademais, ás vacas gústalles. Hoxe acaba de entrar unha por primeira vez a muxirse e faino como se entrase todos os días: tranquila”.
“Desde que temos os Astronaut, elas van muxirse cando queren ou o necesitan. Levántanse e miran se hai moitas vacas agardando ou non. Se hai moitas, ás veces van comer e despois xa volven. Van ao seu ritmo todo o tempo: poucas están aquí agardando”, relata Alba Crous, que agrega que desde a gandería buscan solucións que os seus animais queren e necesitan.
“Ao final, estamos mirando polo benestar e a felicidade dos nosos animais, pero tamén pola dos gandeiros, por suposto. O que se busca nunha granxa é producir. Co muxido robotizado vemos que o logramos, que podemos alongar a lonxevidade do rabaño e que as vacas están mellor”, conclúe a gandeira.
